भदौ-२१, गएरातिदेखिको अविरल वर्षाको कारण अरनिको तथा हेलम्बु राजमार्ग अवरुद्ध भएको छ ।

प्रहरीले जनाए अनुसार पुण्यमाता खोलामा आएको बाढीले बनेपाको पुलबजार क्षेत्र डुबानमा परेको छ । डुबानका कारण अरनिको राजमार्गमा यातायात संचालनसमेत अवरुद्ध भएको छ ।

सोही खोलाको बाढीका कारण बनेपाकै धनेश्वर पुल आसपास पनि डुवानमा परेको छ । उक्त डुवानका कारण बनेपा पनौती सडक अवरुद्ध भई यातायात ठप्प रहेको छ । पुलबजारमा अवरुद्ध भएपछि सवारी साधनहरूलाई नाला हुँदै भक्तपुरबाट पठाइएको प्रहरीले जनाएको छ ।

त्यसैगरी मेलम्ची नगरपालिका १२ र १३ को विभिन्न ठाउँमा पहिरो जाँदा हेलम्बु राजमार्ग अवरुद्ध भएको छ ।

मेलम्ची–१२ बाहुनेपाटी र १३ मेलम्ची–जिरोकिलो सडकखण्डस्थित फटकशिलामा गए रातिदेखि पहिरो खसिरहेकाले सडक अवरुद्ध भएको हो ।

वर्षा रोकिएपछि मात्र पहिरो पन्छाएर सडक सञ्चालनमा ल्याउन सकिने र निकै जोखिम रहेकाले अहिले वैकल्पिक सडक प्रयोग गर्न प्रहरीले आग्रह गरेको छ ।