असार ४, चितवन
बाढीका कारण क्षति भएको मुग्लिन पुलको अनुगमन गरी फर्किने क्रममा चितवनका प्रहरी प्रमुख ओम प्रसाद अधिकारी सहित ६ जना प्रहरी टोली दुर्घटनामा परेका छन् । मुग्लिन नारायणगढ सडक खण्ड अन्तरगत चितवको गाइघाट नजिकै नारायणगढबाट मुग्लिन तर्फ आउदै गरेको ना ६ ख ६०११ नम्बरको मालवाहक ट्रकले जिल्ला प्रहरी कार्यालय चितवनको एसपी सवार बा २ ज ३४७२ नम्बरको जीपलाई ठक्कर दिदाँ एसपीसहित ६ जना प्रहरी टोली घाईते भएका हुन् । घाईते एसपी अधिकारीको टाउको, मुख र हातमा चोट लागेको र अन्य घाइते प्रहरीहरुको टाउको र हातमा चोट लागेको चितवन प्रहरीका प्रवक्ता सूर्य थापाले जानकारी दिएका छन् । घाईते सबैको पुरानो मेडिकल कलेज भरतपुरमा उपचार भईरहेको छ । ट्रकको ठक्करका कारण प्रहरीको जीपको अगाडी भाग पूर्ण रुपमा क्षति भएको छ भने ठक्कर दिने ट्रक र चालक चितवन प्रहरीको नियन्त्रणमा रहेको छ ।